ကိုယ်ရေးအကျဉ်း

May I Introduce Myself,

My Name Is Moe Zet.

I'm A Poet !!!

ကိုယ် - ယုံ - ကြည် - ညွတ် - နူး - ရာ

အ - နု - ပ - ညာ - က - လွဲ - ရင် - အ - ရာ - ရာ

ညည်း - တွား - ဖွယ် - ရာ

ဒုက္ခ - တေး - ချည်း - သာ ...

မိုးဇက်(သခွတ္တနယ်)

ခေတ္တ - မလေးရှား (၃)

ခွင့် ပြု တော် မူ ကြ ပါ
ကျွန်တော့်ရဲ့ ''ကြောင်လျှာသီး" လေးကိုတော့
မေမေ့ရဲ့ မျှော်လင့်ချက်တွေနဲ့အတူ
မြင့်မြတ်ရာ အရပ်မှာထားပြီး
အိပ်ပါရစေ။

ယဉ်ကျေးမှု မတူတဲ့ ယဉ်ကျေးမှုများ လက်ချင်းဆုပ်
ရိုင်းစိုင်းမှု မတူတဲ့ ရိုင်းစိုင်းမှုများ ခွက်ချင်းခုတ်
ဓမ္မတွေ အ,နေသော အဓမ္မများ

ဒီဘက်က စက္ကူတစ်ရွက်ရယ်
ဟိုဘက်က စက္ကူတစ်ရွက်ရယ် ဘယ်လောက်ကွာလို့လဲဆိုတော့
ဟိုဘက်က ကျွန်တော့်နွေးထွေးမှုရယ်
ဒီဘက်က ကျွန်တော့်ရုန်းကန်မှုရယ် ကွာသလောက်ကွာမှာပေါ့။

ခင်ဗျားတို့က ကျွန်တော့်ကိုဖမ်းဖို့ ချောင်းနေကြတာလား
ဖမ်းပေါ့
ကျွန်တော်လည်း ငါးတစ်ကောင်ကို ဖမ်းဖို့ ချောင်းနေတာ

ဒီလိုပါပဲ ကိုရွှေရယ်
အဆင်ပြေလား ဆိုတဲ့ မေးခွန်းကို အဆင်ပြေအောင်ဖြေဖို့
သိပ်အဆင်မပြေလှပါဘူး။

ဘုရားသောက်တော်ရေခွက်ကို ကော်ဖီထည့်ဖျော်သောက်တဲ့
လူတွေကြား
ကော်ဖီခွက်ကို ယမကာငှဲ့ထည့်တဲ့
လူတွေကြား
ယမကာခွက်ကို ဆေးလိပ်ပြာထည့်ချွေတဲ့
လူတွေကြား
ဆေးလိပ်ပြာချွေခွက်ကို ကွမ်းတံတွေး ထွေးထည့်တဲ့
လူတွေကြား
လူတွေကြားမှာ " လူ " အဖြစ် ပျောက်ဆုံးနေတဲ့
လူတွေကြား
လူလို သူလို ဟန်ဆောင် ပန်ဆောင် " လူ " နေရတဲ့
လူတွေကြား
ကျွန်တော်ဟာ တလူလူ လွင့်နေတဲ့ လူငယ်

လွင့်ခဲ့တယ်။
ဧရာဝတီရဲ့ ရင်ခွင်ကနေ ကျွန်ရောင်း ကျွန်ဝယ်ထွန်းကားရာ
ကျွန်းကလေးအထိ
လွင့်ခဲ့တယ်။
အမှိုက်တစ်စလို လေမွှေ့ရာ ယိမ်းရင်း နွဲ့ရင်း
လွင့်ခဲ့တယ်။
ကျေးလက်တေး ၊ သနပ်ခါးရနံ့ ၊ ချစ်ခြင်းတရားတို့နဲ့ ဝေးရာ

ရောက်တဲ့နေရာကနေ
သမုဒ္ဒရာဘယ်နှစင်းအလွန်မှာ ကျွန်တော့်အသိုက်အမြုံလေး ရှိနေမှာလဲ
ပစ္စုပ္ပန်ကနေ
တောင်စဉ်ဘယ်နှထပ်အဝေးမှာ ကျွန်တော့ဝပ်ကျင်းကလေး ရှိနေမှာလဲ
လက်ရှိဘဝကနေ
ထမင်းဘယ်နှလုတ်အကွာမှာ ကျွန်တော့်ချစ်ရိပ်မြုံလေး ရှိနေမှာလဲ
ထင်ရှားတဲ့ အမှတ်အသားတစ်ခုက ကျွန်တော့်မှာ မိသားစုရှိတယ်။
ကျွန်တော့်မှာ မိသားစုရှိတယ်။
ဒါ ၊ ထင်ရှားတဲ့ အမှတ်အသားတစ်ခုပါပဲ။ ။

မိုးဇက်(သခွတ္တနယ်)

ညနေ

အိမ်အပြန် ခြေလှမ်းများသုတ်သုတ်
လမ်းပေါ်က ဖိတ်ကျလောက်အောင် တရွေ့ရွေ့
စက်တပ်ယာဉ်များ မိန်းမပျိုလေး ရေအိုးရွက်လာပုံ
ပေါ်လာနိုးနိုး ပန်းချီကားထဲ
သျောင်တစောင်းနဲ့ ပုလွေထိုင်မှုတ်နေတဲ့ လူငယ်
ဘယ်ဆီလဲ ငှက် နဲ့ တိမ် အမှောင်ဆီ
အပြေးအလွှား ခေတ်က
နွားရိုင်းသွင်းချိန်ကို
သွင်းလိုက်တော့။ ။

မိုးဇက်(သခွတ္တနယ်)

- ကောက်ကြောင်းခြစ်ထားတဲ့အတိုင်းပဲ ၊ မပြုရက် ၊ မပြင်ရက် -

ခရီးသည်

နေပူရှိန်က အရမ်းပြင်းတယ်
ငါတို့ အရိပ်ခိုဖို့ သစ်တစ်ပင်မှ မစိုက်ရသေးဘူး။

နှင်းတွေ ပိတ်ပိတ်သည်းသည်းကျတယ်
ငါတို့အတွက် အနွေးထည်တွေက မချုပ်လုပ်ရသေးဘူး။

မိုးတွေ သည်းသည်းမည်းမည်းရွာတယ်
ငါတို့ ထီးတစ်ချောင်းရဲ့အသုံးဝင်မှုကို မေ့နေကြတယ်။

လေတွေ တရကြမ်းတိုက်ခတ်လာတော့
ငါတို့မှာ ပုန်းခိုဖို့နေရာ မရှိပြန်ဘူး။

ခြေရာတွေအတိုင်းပဲ လိုက်ခဲ့ကြတယ်
လမ်းခွဲရောက်တော့မှ
ငါတို့ ဘယ်သွားမလဲဆိုတာ စဉ်းစားမိရဲ့ ...

အဲဒီလိုနဲ့
ငါတို့ ပန်းတိုင်တွေပျောက်ခဲ့ကြတယ်။ ။

မိုးဇက်(သခွတ္တနယ်)

07.12.2009

ရေတံခွန်

အစဉ်အလာအရ
နိမ့်ရာကို စီးဆင်းပေမယ့်
ငါဟာ စမ်းချောင်းတစ်ခု မဟုတ်ဘူး
မြစ်ကျိုးအင်းလိုလည်း
သေဆုံးမယ့်ရက်ကို စောင့်မျှော်မနေဘူး
ကျောက်ဆောင်ကျောက်ခဲ ဘယ်လောက်ပင်ထူထပ်ပါစေ
ကိုယ့်လမ်း ကိုယ်ဖောက်မယ်
ပြီးရင်
ပင်လယ်အရောက် ကူးခတ်မယ်။    ။

မိုးဇက်(သခွတ္တနယ်)

06.12.2009

စက်ရုပ်လူသား

ဒီလို အဖိအနှိပ်ခံ ဘဝခါးခါး
ခံစားမှုတို့ တင်းကျပ်ပေါက်ကွဲ
အလဲလဲ အကွဲကွဲ ရှင်သန်ခြင်းမှာ
အသည်းကို အသည်းချင်း
နှလုံးသားကို နှလုံးသားချင်း
စာနာထောက်ရှု နားလည်မှုပေးနိုင်တဲ့
မေတ္တာတရားဆိုတာ ဝေဝေဝါးဝါး ...

ကံကြမ္မာကို အပြစ်ပုံမချချင်ဘူး
ဒါ ... ငွေတိုးချေးသမားစခဲ့တဲ့ဇာတ်လမ်း
Agent ရေးတဲ့ ဇာတ်ညွှန်း
မွန်းကျပ်ဖွယ်တေးသွားအစုံစုံနဲ့
သူဌေးဆိုသူရဲ့ စီစဉ်တည်းဖြတ်မှုအောက်မှာ
ဇာတ်ရုပ်ကျရာ သရုပ်ဆောင်ရတဲ့ ကျွန်တော်
ဝေးရပ်မှာ တော်ရဲ့လား ... ပျော်ရဲ့လား ...

တစ်နေ့တာ ပင်ပန်း နွမ်းလျ
နေထွက်စမှ ညသန်းခေါင်မိုးချုပ်
အလုပ်ခွင်မှာ ကုန်ဆုံး
ထိပ်ဆုံးရောက်ကုန်ဈေးနှုန်းနဲ့
စောက်ထိုးမိုးမျှော် ငွေပေါက်ဈေး
စေ့စပ်ညှိနှိုင်းပေးဖို့
အပြေးနှုန်းကို ထပ်မြှင့်ထား ...

ဘဝကနင်းပြား
ကိုယ်ပိုင်အချိန်ကို ရောင်းစားမိလေတော့
သူတို့ရဲ့ထိန်းချုပ်မှုအောက်မှာ
စက်ဖြစ်လိုက် လူဖြစ်လိုက်
တပ်ဆင်လိုက် ဖြုတ်ချလိုက်နဲ့
ဒီည အိပ်စက်ခြင်းဟာ
မနက်ဖြန်အတွက် သံပတ်တင်းအား ... ။ ။

မိုးဇက်(သခွတ္တနယ်)

10.03.2010

သူ့ ... ကျွန်

ကံကြမ္မာရယ်
ငါ ဘယ်အထိ ဆက်လွင့်ရဦးမလဲ
အလျင်လိုလို့ လမ်းအိုပဲလိုက်ခဲ့တယ်
မလေးရှားဆိုလို့ မလေးရှားကိုလာခဲ့ပါတယ်
ကွယ် ...
မှန်းချက်က နှမ်းထွက်မကိုက်ဆိုသလိုမျိုး
အတိုးက ကြီးကြီး
အရင်းအနှီးက များများ
လစာက နည်းနည်း
စားစရိတ်ကိုချွေတာ
အသုံးစရိတ်ကိုချွေတာ
ဟိုသွားဒီလာကိုလျှော့
ဘီယာတောင် မမော့ဖြစ်ပါဘူး
နိစ္စဓူဝ
အလုပ်မှ အိမ် ၊ အိမ် မှ အလုပ်
ကုပ်ကုပ်ကလေးနေထိုင်
ယိုင်နေတဲ့စိတ်ကို အားပေး
အတွေးဆိုးတွေကို ဖျောက်ပစ်
စိတ်မညစ်ခင်မှာ ပျော်အောင်အိပ်ရတယ်
ဘဝက အဆင်မပြေလွန်းတော့လည်း
အလဲလဲ အကွဲကွဲနွှဲရတာ အရသာမရှိဘူး
ဟူးးးး ....... ဘာလဲ
မလေးရှား ငွေ က ငါတို့ 'ရွှေ' ထက် အဖိုးတန်နေလို့လား
Hand Phone အစုတ်တစ်လုံးက ငါတို့ 'ရွှေ' တွေထက် လူရာဝင်နေလို့လား
စိတ်ကူးထဲမှာ ယဉ်ပြီး အပြင်မှာ ရိုင်းနေတာ ဘဝလား
သတိရမိပါသေးတယ်
Agent တွေ ပြောခဲ့တဲ့အကြောင်းအရာ
"တစ်ရွာမပြောင်း သူကောင်းမဖြစ်" တဲ့
ခုတော့
"သေချင်တဲ့ ကျား တောပြောင်း" မှားပြီလား
ကံကြမ္မာရယ်
ငါ ဘယ်အထိ ဆက်လွင့်ရဦးမလဲ။ ။

မိုးဇက်(သခွတ္တနယ်)

23.10.2009