သေတမ်းစာ

ငါ အရမ်းချစ်တယ် " မအ၀ှာ "

အဲဒီစကားကို နောက်တစ်ခေါက်ထပ်မပြောချင်ဘူး
နောက်တစ်ယောက်လည်း ထပ်မပြောချင်ဘူး

ဒါပေမယ့် ငါ့ကို မုန်းပါ
ငါ့ကို ချစ်မိသွားတယ်ဆိုရင်တောင်မှ ငါ့ကိုမုန်းပါ

ဘ၀အာမခံချက် မရှိခြင်းဟာ
ချစ်ခြင်းကိုလည်း ယိမ်းယိုင် ပြိုလဲစေတယ် လို့
ငါ့ အုတ်ဂူထက်မှာ ရေးထွင်း
ငါ့ သူငယ်ချင်းတို့ သင်ခန်းစာရစေကွယ် ။ ။

မိုးဇက်(သခွတ္တနယ်)

ဥဒါန်း

ချစ်ခင်လေးမြတ်စွာဖြင့်
လူတချို့ကို အလေးပြုလိုက်ပါ၏
နားနှစ်ဖက်ပိတ်ပြီး
ဝင်ရောက်ဆွေးနွေးသောသူနှင့် ၀င်ရောက်ဆွေးနွေးခြင်းမပြုနိုင်သော
ကျွန်တော်သည်
စက်ရုပ်တစ်ကောင်၏အပြုံးကို " လောက၀တ် " ဟု
ကြံဖန်ပျူငှာတတ်သောသူတို့နှင့်လည်း
ဆန့်ကျင် ကွဲလွဲကြောင်း

ကိုယ့်ပေါင်ကို ကိုယ့်ကလောင်နှင့် လှန်ထိုးမိသည်ဖြစ်စေ
သူ့နောက်ကျောကို လှမ်းထိုးမိသည်ဖြစ်စေ
နာကျင်ရတာချင်း အတူတူပဲဆိုတာ
ငုံ့ထားသောဦးခေါင်းပေါ်
တံတားတစ်စင်းလို နင်းလျှောက်သွားသောလူတချို့အား
အလေးပြုပါ၏ ။ ။

မိုးဇက်(သခွတ္တနယ်)

တိုက်ဆိုင်မှုရှိလျှင် ထိုသူများကိုရည်ညွှန်းပါသည်

ဘာကြာသေးလို့လဲ အွန်လိုင်းပေါ်စရောက်လာတာ
ဘာကြာသေးလို့လဲ ဖေ့ဘွခ်ကိုသုံးတတ်လာတာ
ဘာကြာသေးလို့လဲ သူတို့နှစ်ယောက် စတွေ့ကြတာ
ဘာကြာသေးလို့လဲ သူငယ်ချင်းတွေဖြစ်လာကြတာ
ဘာကြာသေးလို့လဲ သံယောဇဉ်တွေ ရစ်ပတ်တွယ်တာ
ဘာကြာသေးလို့လဲ တဆင့်တက်ပြီးချစ်သူဖြစ်တာ
ဘာကြာသေးလို့လဲ ကတိသစ္စာတွေချည်နှောင်ကြတာ
ဘာကြာသေးလို့လဲ စိတ်ကူးတွေ အိပ်မက်တွေ ပုံတူကူးတာ
ဘာကြာသေးလို့လဲ ရယ်မောလိုက် နောက်ပြောင်လိုက်လုပ်နေတာ
ဘာကြာသေးလို့လဲ စိတ်ဆိုးလိုက် ကြည်နူးလိုက်လုပ်နေတာ
ဘာကြာသေးလို့လဲ ရန်ဖြစ်လိုက် ပြန်ချစ်လိုက်လုပ်နေတာ
ဘာကြာသေးလို့လဲ မတွေ့မဆုံရ မနေနိုင်အောင်ဖြစ်နေတာ
ဘာကြာသေးလို့လဲ တူတူပုန်းတမ်းကစားနေတာ
ဘာကြာသေးလို့လဲ သံသယမီးတွေ ထလောင်တာ
ဘာကြာသေးလို့လဲ ....
ဘာကြာသေးလို့လဲ .... ....
ဘာကြာသေးလို့လဲ .... .... ....
ဘာကြာသေးလို့လဲ နှစ်ဦးသဘောတူ/မတူ လမ်းခွဲသွားတာ
ဘာကြာသေးလို့လဲ ဘာမှ မကြာသေးဘူး ။    ။

မိုးဇက်(သခွတ္တနယ်)

ဝန်ခံချက် ။   ။ အထက်ပါခေါင်းစဉ်မှာ မွေးစားစကားလုံးဖြစ်ပါသည် ။

အိမ်ကလေး ရဲ့ အဝေးမှာ

အိမ်ကလေး ရဲ့ အဝေးမှာ ငါဟာ အိမ်ပြေးလေးတစ်ယောက်လို
အိမ်အများအပြားပိုင်ဆိုင်တဲ့ ခြေသလုံးအိမ်တိုင်မင်းသား ဖြစ်ခဲ့ဖူးတယ် ။

အိမ်ကလေး ရဲ့ အဝေးမှာ ငါဟာ ဂျစ်ပစီတစ်ယောက်လို ရိုးသားခဲ့ဖူးတယ်
လူကြီးလူကောင်းတစ်ယောက်လို မိုက်မဲခဲ့ဖူးတယ်
ကလေးသူငယ်တစ်ယောက်လို ယဉ်ကျေးခဲ့ဖူးတယ်
လူယဉ်ကျေးတစ်ယောက်လို ရိုင်းစိုင်းခဲ့ဖူးတယ်
လူရိုင်းတစ်ယောက်လို ဖြူစင်ခဲ့ဖူးတယ်
လူ့ဂွစာတစ်ယောက်လို ပွင့်လင်းပြတ်သားခဲ့ဖူးတယ် ။

အိမ်ကလေး ရဲ့ အဝေးမှာ ငါဟာ သားကောင်လိုတိုက်ခိုက်ခဲ့ဖူးတယ်
မုဆိုးလို ထောင်ချောက်မိခဲ့ဖူးတယ် ။

အိမ်ကလေး ရဲ့ အဝေးမှာ ငါဟာ ဖိနပ်တစ်ရံလိုပြောင်လက်ခဲ့ဖူးတယ်
တစ်ရှူးတစ်စလို ပေကျံခဲ့ဖူးတယ် ။

အိမ်ကလေး ရဲ့ အဝေးမှာ ငါဟာ ' ထ' ဆင်ထူးကိုထောင်ပြီး ' ၀ိ' လုပ်ပြီး နေထိုင်ခဲ့ဖူးတယ်
ခုထိတော့ '၀' လုံးကိုတောင်မှ ၀ိုင်းအောင်မရေးတတ်သေးပါ ။

အိမ်ကလေး ရဲ့ အဝေးမှာ ငါဟာ
ကောင်းကင်က ကြယ်ကလေးကိုပဲ ငေးကြည့်နေမိတော့တယ်
မိသားစုတွေ ဘယ်တော့ပြန်ဆုံမလဲ မေမေ ။ ။

မိုးဇက်(သခွတ္တနယ်)